SHEIN ACHAGIZA WATENDAJI MAHAKAMA ZA WATOTO.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

RAIS wa Zanzibar, Dk Ali Mohamed Shein ametoa changamoto kwa watendaji wa mahakama za watoto nchini kuongeza kasi, ari na kubuni mbinu bora zaidi zitakazowezesha mahakama hizo kumaliza kesi zao haraka.

Katika hotuba yake baada ya kuweka jiwe la msingi la jengo la Mahakama ya Watoto Mahonda katika Mkoa wa Kaskazini Unguja juzi, Dk Shein alisema pale ambapo ushahidi wa kesi hizo upo, hakuna sababu za mahakama kuchelewesha kesi hizo.

Hata hivyo alikiri kuwa uendeshaji wa kesi za udhalilishaji watoto umekuwa ukikumbana na mazingira magumu hasa pale watu wanaopaswa kutoa ushahidi mahakamani wanapokataa kufanya hivyo.

“Naamini mahakimu hawana nia ya kuchelewesha kesi hizo, lakini ukweli ni kuwa kesi hizo zina mambo mengi magumu ikiwemo mashahidi kukataa kufika mahakamani kutoa ushahidi,” alisema Dk Shein.

Alifafanua kuwa ni kweli ucheleweshaji kesi za udhalilishaji watoto na wanawake unasababisha manung’uniko kutoka kwa wananchi na taasisi zinazofuatilia kesi hizo, lakini aliwahakikishia wananchi kuwa Serikali itaendeleza jitihada zake kuhakikisha haki za mtoto zinalindwa kwa mujibu Sheria ya Mtoto ya Zanzibar, Namba 6 ya mwaka 2011 pamoja na mikataba mingine ya kimataifa kuhusu haki za watoto.

Alibainisha kuwa ujenzi wa mahakama hiyo ni sehemu ya utekelezaji wa Mkakati wa Miaka Mitano (2013- 2018) wa Mapitio na Marekebisho ya Sheria ya Watoto ambao umelenga kulinda haki za watoto wenye matatizo ya kisheria.

Aliipongeza Idara ya Mahakama kwa kushirikiana na taasisi nyingine zinazoshughulikia kesi za udhalilishaji watoto kwa kuchukua hatua mbalimbali za kuhakikisha kuwa kesi hizo zinashughulikiwa haraka na kutolewa hukumu.

Katika maelezo yake kabla ya kumkaribisha mgeni rasmi, Jaji Mkuu wa Zanzibar, Omar Othman Makungu alieleza kuwa ujenzi wa mahakama hiyo kunafanya idadi za mahakama za watoto kufikia tatu; ya Vuga katika Mkoa wa Mjini Magharibi na Chake Chake ambayo itakuwemo katika Jengo la Mahakama mjini Chake Chake, Kusini Pemba.

Alisema ujenzi wa mahakama hiyo ambao umefadhiliwa na Shirika la Umoja wa Mataifa la Kuhudumia Watoto (UNICEF) kwa gharama ya Sh milioni 77, unatarajiwa kukamilika mwezi ujao.

CHANZO: HABARI LEO.