‘Muhali’ unavyochochea vitendo vya ubakaji Zanzibar

 

Waziri wa Ustawi wa Jamii, Wanawake na Watoto Zanzibar, Zainab Omar Juma. Waziri huyu anasema jamii ikitoa ushirikano ubakaji utakwisha Zanzibar. 

Imani na ustaarabu wa watu wa Zanzibar vimeanza kupotea. Sasa eneo hilo ni miongoni mwa  maeneo yanayoongoza kwa matukio ya ubakaji nchini. Watuhumiwa nao wanaonewa haya kupelekwa katika vyombo vya sheria, kama makala haya yanavyoeleza.

Maisha ya mtoto Siajabu Abdallah (sio jina lake halisi), yako mashakani. Woga na wasiwasi vimemzonga akilini, kiasi cha kushindwa hata kutembea peke yake.

Madhila haya yote yampatayo mtoto huyu wa umri wa miaka 12, yanatokana na tukio la kinyama alilofanyiwa miezi minne. Ni tukio la kubakwa ambapo awali mtu aliyemfanyia unyama huo alimpiga kabla ya kutimiza haja zake.

Siajabu anasimulia kuwa mkasa huo ulimpata alipokuwa njiani akielekea shuleni. Alikutana na kijana njiani aliyemkamata kwa nguvu, akamfunga kamba na kisha kutimiza azma yake iliyomsababishia maumivu makubwa mwilini.

Iliwalazimu madaktari kufanya kazi ya ziada kuokoa maisha ya mtoto huyu aliyeumizwa vibaya katika sehemu zake za siri.

Sasa Siajabu anaendelea vyema kijijini Kiyanga baada ya kushonwa nyuzi sita sehemu za siri. Lakini ili kwenda shule, hana imani na usalama wake, analazimika kuongozana na kaka ama dada.

Dada yake aitwaye Mariamu Said Othman anasema kwa sasa mdogo wake hawezi kwenda shule peke yake, lazima aambatane na mtu mzima.

  “Ndugu yangu baada ya kubakwa ameathirika kisaikolojia, yaani akimwona mtu yeyote anamwogopa” anasema huku akilia.

Ubakaji Zanzibar

Siajabu ni miongoni  mwa watoto kadhaa waliopatwa na kadhia ya kubakwa katika Wilaya ya Magharibi, huku wahusika wakishindwa kufikishwa katika mikono ya sheria.

Licha ya kampeni zinazoendelea kupiga vita vitendo vya ukatili wa kijinsia ikiwemo ubakaji,  hali kisiwani unguja siyo nzuri kwa kuwa vitendo hivyo vinashamiri huku jamii ikionekana kukaa kimya bila ya kuchukua hatua stahiki.

 Viongozi  wa Serikali, mitaa, wanaharakati wanasema vita dhidi ya ubakaji vinakwamishwa na kukithiri kwa rushwa miongoni mwa watendaji wa vyombo vya sheria na uelewa mdogo wa jamii kuhusu unyanyasaji kwa watoto.
CHANZO;MWANANCHI