Dk Shein ataka maendeleo Z’bar

Zanzibar. Rais wa Zanzibar, Dk Ali Mohammed Shein, amewahimiza wananchi kujitolea katika kujiletea maendeleo huku akiwahakikishia kuwa Serikali itaendelea kuziunga mkono jitihada hizo kwa manufaa yao na Taifa.

Akizungumza katika ufunguzi wa Kituo cha Afya cha Kajengwa Makunduchi Mkoa wa Kusini Unguja jana alisema, Serikali wakati wote itaendelea kuziunga mkono jitihada za wananchi za kujiletea maendeleo.

Dk Shein aliwaeleza wananchi waliohudhuria uzinduzi huo ambao ni sehemu ya kuadhimisha miaka 50 ya Mapinduzi kuwa, uimarishaji wa huduma za afya ni uamuzi uliofanywa na Chama cha Afro Shirazi kama ulivyobainishwa katika mkutano wake wa kampeni za uchaguzi Julai 8 ,1964.

Aliwakumbusha wananchi hao historia ya utoaji huduma za afya kabla ya Mapinduzi ambayo ilikuwa ya kibaguzi ambapo wananchi wanyonge hawakuweza kupata huduma hizo lakini hivi sasa jambo hilo limebaki kuwa historia.

Aliwapongeza wananchi hao kwa kuonyesha moyo wa kujitolea ambapo ujenzi wa kituo hicho ulianza mwaka 1999 hatimaye umekamilika na sasa wanaweza kupata huduma za afya kwa urahisi.

Mkuu wa Mkoa wa Kusini Unguja, Dk Idrissa Muslim Hija aliishukuru halmashauri hiyo kwa jitihada zake za kuhakikisha kituo hicho kinakamilika na kuahidi kukitunza.

Katika risala yao iliyosomwa na Katibu wa Kamati ya Maendeleo, Shehia ya Kajengwa,Nassor Simba Hassan alisema wananchi hao walieleza kuwa kukamilika kwa kituo hicho kumewapunguzia tabu ya kufuata huduma hizo mbali.

“Tulipata tabu kufuata huduma hii masafa marefu na ugumu ulizidi kipindi cha mvua na nyakati za usiku kwa mama wajawazito na watoto,”ilieleza risala hiyo.

Wakati huo huo Zanzibar imesema hakuna ushahidi wala uthibitisho wowote uliobaini kwamba Upanga wa Dhahabu wa Jumuiya ya Jeshi la Polisi la Nchi za Kusini mwa Afrika (SARPCCO) ulipotelea Zanzibar.

Waziri wa Nchi Ofisi ya Makamu wa Pili wa Rais, Mohammed Aboud Mohammed ameyasema hayo jana wakati akijibu masuali katika kikao cha baraza la wawakilishi kinachoendelea huko Chukwani Mjini Unguja

Chanzo;Mwananchi