RAZA: VIONGOZI WAMEZALISHA UFISADI TANZANIA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Rais Dk. John Magufuli

Mfanyabiashara maarufu wa Zanzibar, Mohamed Raza,  amesema ufisadi umefikia hatua ya kutisha Tanzania kutokana na viongozi kushindwa kusimamia miiko na maadili ya uongozi.

 

Raza alitoa tamko hilo jana alipokuwa akizungumza na waandishi wa habari huko Malindi, Zanzibar, kuhusu hatua za kupambana na ufisadi zinazoendelea kuchukuliwa na Rais Dk. John Magufuli, tangu alipochaguliwa Oktoba, mwaka jana. 

 

Alisema kwa muda mrefu viongozi waliopewa dhamana  ya kusimamia serikali wameshindwa kupambana na rushwa na ufisadi kutokana na kuporomoka kwa  miiko na maadili ya uongozi na kupeana vyeo kwa kuangalia urafiki na ushemeji.

 

“Rais wetu amerejesha matumaini makubwa kwa wananchi na heshima ya serikali baada ya muda mrefu watu kupeana vyeo kwa kuangalia urafiki na ushemeji kwa sababu ya kuporomoka maadili ya uongozi,” alisema.

 

Kwa mujibu wa Raza, wakati umefika serikali kuzifanyia uchunguzi kesi za zamani za ufisadi zikiwemo za ununuzi wa Rada, EPA na ESCROW na wahusika wafikishwe katika mikondo ya sheria.

 

Alisema kashifa hizo za ufisadi hazikufanyiwa uchunguzi wa kina kutokana na mazingira ya serikali kwa wakati huo, lakini serikali ya awamu ya tano imeonyesha kwa vitendo uchungu wake dhidi ya ufisadi.

 

Alisema wabunge wana nafasi nzuri ya kumsadia Rais katika kikao kinachoanza mwezi huu kutokana na hotuba yake kugusa kero mbalimbali vikiwemo ya ufisadi, urasimu na uwajibikaji kwa watumishi wa serikali.

 

"Wito wangu wabunge wa vyama vyote wajadili hotuba ya Rais wetu kwani ina mambo mengi ya kuleta heshima kwa Tanzania. Muhimu wazungumze kwa uwazi na ukweli," alisisitiza.

 

Pia alisema inasikitisha kuona watu walikuwa wanakwepa kulipa kodi ya mabilioni ya fedha wakati kuna Watanzania wanashindwa kupata huduma muhimu za kijamii na wengine kula mlo mmoja kwa siku.

 

Aliwaonya baadhi ya watu kuwa kama wanadhani kasi ya Rais Dk. Magufuli ni nguvu ya soda, wanajidanganya kutokana na msingi wa uwajibikaji unaoendelea kuenea katika ngazi mbalimbali za uongozi wake.

 

Hata hivyo, alisema kuwa kasi ya uwajibikaji inapaswa kuungwa mkono pia na serikali ya Mapinduzi ya Mapinduzi Zanzibar (SMZ) ili kuondoa urasimu katika upatikanaji wa huduma za jamii na vitendo vya uzembe kwa watumishi wa umma.

 

Kuhusu kero za Muungano, alisema anaamini iwapo Wazanzibari watajenga hoja, Rais Magufuli ana uwezo mkubwa wa kuondosha kero za Muungano kwa wakati muafaka.

 

Akizungumzia mkwamo wa uchaguzi Zanzibar, alisema mazungumzo yanayoendelea yana umuhimu mkubwa kuthaminiwa na kuungwa mkono na wananchi katika kutafuta ufumbuzi wa mgogoro huo.

 

Alisema viongozi wanaoshiriki mazungumzo hayo ni wazito hivyo utafika wakati watapata ufumbuzi hivyo ni muhimu wananchi kuwa na moyo wa subira.

CHANZO: NIPASHE.