Wafanyabiashara wa viungo Mumbai wakaribishwa Z'bar

RAIS wa Zanzibar, Dkt. Ali Mohamed Shein, amewaambia wafanyabiashara wa viungo mjini Mumbai, kuwa Zanzibar haina pingamizi kuwauzia karafuu zake moja kwa moja na akawataka wafanye mazungumzo na Shirika la Biashara la Zanzibar-BI ZANJE kuhusu jambo hilo.

Rais alikutana na wafanyabiashara hao baada ya kutembelea kiwanda kikubwa cha kutengeneza viungo cha Everest, kilichoko nje kidogo ya jiji la Mumbai.
Aliwaeleza wafanyabiashara hao kuwa Serikali ya Mapinduzi ya Zanzibar hivi sasa inatekeleza mkakati wa kufufua zao la karafuu ambalo lilidumaa miaka iliyopita.
Alisema mkakati huo ambao unajumuisha kuongeza kasi ya upandaji wa mikarafuu mipya pamoja na kuwapa wakulima bei nzuri ya soko, uzalishaji umeanza kuongezeka na hata kuweza kutosheleza mahitaji ya wafanyabiashara hao ambayo tani 10,000 kwa mwaka.
Dkt. Shein alitoa mwaliko rasmi kwa wafanyabiashara hao kutembelea Zanzibar na kufanya mazungumzo na Shirika la ZSTC.
Awali, baadhi ya wafanyabiashara hao walieleza changamoto zilizowafanya kuacha kununua karafuu moja kwa moja kutoka Zanzibar kwa hiyo tamko hilo la Rais wa Zanzibar walieleza kuwa limewatia moyo na kuahidi kufanya biashara hiyo moja kwa moja na Zanzibar .
Walibainisha kuwa wao wanazihitaji sana karafuu za Zanzibar kutokana na ubora wake na kuzisifia kwa kusema kuwa ndiyo 'Mfalme wa karafuu duniani'.
Akizungumzia historia ya biashara kati ya Zanzibar na India, Dkt.Shein alisema biashara kati ya nchi hizo imedumu kwa miaka karibu 150 na kwamba Zanzibar ipo tayari kutiliana saini makubaliano ya ushirikiano na Kampuni ya viungo ya Everest ambayo inatumia karafuu na viungo vingine kwa wingi.
Wakati huo huo, Dkt. Shein amesema ziara yake nchini humu imekuwa ya mafanikio na kufikia malengo yake.Akizungumza na waandishi wa habari mara baada ya kutembelea kiwanda cha kusindika viungo mjini hapa jana Dkt. Shein aliwaeleza waandishi hao kuwa ziara yake hiyo imepata mafanikio katika kuimarishau husiano wa kidiplomasia na kisiasa kati ya Jamhuri ya Muungano wa Tanzania na Jamhuri ya India.
Kwa upande mwingine alifafanua kuwa ziara hiyo ya siku tisa iliyomuwezesha kuzuru miji ya New Delhi, Jaipur, Hyderabad, Bangaluru na Mumbai imeiwezesha Zanzibar na India kuimarisha ushirikiano katika sekta za utalii, uwekezaji, afya, kilimo na uwezeshaji wananchi.
Aliongeza kuwa mbali ya kutia saini makubalinao ya ushirikiano katika baadhi ya sekta lakini pia wahusika wa sekta hizo wamealikwa kutembelea Zanzibar kwa mashauriano zaidi katika kuendeleza ushirikiano katika sekta zao.
Dkt. Shein alitumia fursa hiyo kuwashukuru viongozi wa India hususan Makamu wa Rais wa nchi hiyo Mhe. Mohammad Hamid Ansari na Waziri Mkuu Manmohan Singh kwa kumualika kuzuru India rasmi.

Chanzo;Majira