RAIS WA ZANZIBAR ATOA PONGEZI NA SHUKURANI KWA SERIKALI YA JAMHURI YA WATU WA CHINA.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

RAIS wa Zanzibar na Mwenyekiti wa Baraza la Mapinduzi Dk. Ali Mohamed Shein ametoa pongezi na shukurani kwa Serikali ya Jamhuri ya Watu wa China kwa kuendelea kuiunga mkono Zanzibar katika kuimarisha sekta ya afya ikiwa ni pamoja na kuendelea kuwaleta Madaktari kila baada ya miaka miwili hapa nchini.

Dk. Shein aliyasema hayo leo huko Ikulu mjini Zanzibar katika mazungumzo kati yake na  Madaktari kutoka Jamhuri ya Watu wa  China waliomaliza muda wao wa kazi hapa nchini waliofika Ikulu kwa ajili ya kumuaga Rais wakiongozwa na Balozi Mdogo wa nchi hiyo anayefanya kazi zake hapa Zanzibar Mhe. Xie Yunliang.

Katika mazungumzo hayo, Dk. Shein alieleza kuwa utamaduni wa kuwaleta Madaktari bingwa kutoka China ni wa kihistoria ambao umeanza tokea mwaka 1965 baada ya nchi hiyo kuleta wataalamu wake mbali mbali  hapa Zanzibar wakiwemo Madaktari bigwa hatua ambayo inaendelea hadi hii leo.

Dk. Shein alisema kuwa Serikali ya Mapinduzi ya Zanzibar pamoja na wananchi wake wanathamini na wanazipenda huduma mbali mbali zinazotolewa na Madaktari hao hapa Zanzibar.

Dk. Shein pia, alitumia fursa hiyo kueleza uhusiano na ushirikiano uliopo kati ya China na Zanzibar na kuahidi kuendelezwa na kudumishwa, huku akisisitiza kuwa nchi hiyo imeweza kutoa mchango mkubwa katika mafanikio ya sekta ya afya hapa nchi.

Aidha, Dk. Shein alieleza mafanikio yaliofikiwa katika kutoa huduma za afya hapa Zanzibar ambapo hivi sasa huduma nyingi ambazo zilikuwa zinapatikana nje ya Zanzibar hivi sasa zimekuwa zikipatikana kwa kutolewa kwa ufanisi mkubwa ikiwa ni pamoja na huduma za upasuaji wa maradhi mbali mbali yakiwemo ubongo na uti wa mgongo.

Dk. Shein alieleza kuwa mbali ya huduma hiyo ya afya waliyoitoa kwa wananchi wa Zanzibar pia, aliwapongeza Madaktari hao kwa kulifanyia kazi wazo lake la kipaumbele katika kinga juu ya maradhi mbali mbali kazi ambayo waliifanya kwa ufanisi mkubwa.

Pamoja na hayo, Dk. Shein alitoa pongezi zake kwa Serikali ya China chini ya kiongozi wake Rais Xie Jingping kwa kuendelea kuisaidia na kuiunga mkono Zanzibar katika kuendeleza miradi mbali mbali ya maendeleo ambayo hivi sasa inatekelezwa ukiwemo ujenzi wa Hospitali ya Abdalla Mzee Mkoani Pemba, Ujenzi wa Uwanja wa Mao tse Tung na ujenzi wa jengo jipya la abiria katika uwanja wa ndege wa Abeid Amani Karume Zanzibar.

Nao Madaktari hao kwa upande wake walitoa shukurani kwa Serikali ya Mapinduzi ya Zanzibar chini ya uongozi wake Dk. Sheim wananchi pamoja na uongozi na wafanyakazi wote wa Wizara wa Afya kutokana na ushirikiano mkubwa waliopata wakati wote.

Kiongozi wa Madaktari hao, Dk.  Liu Yaping akitoa shukurani kwa niaba ya Madaktari hao alisema kuwa timu hiyo ya Madaktari 25 kutoka China ambayo imefanya kazi kwa muda wa miaka miwili hapa nchini kwa bidii na mashirikiano makubwa kati yao na madaktari Wazalendo kwa lengo la kutoa huduma kwa wananchi wa Zanzibar.

Alisema kuwa mbali ya kutoa huduma za afya kwa wananchi wa Zanzibar, Madaktari hao  kwa msaada mkubwa wa Serikali ya Jamhuri ya Watu wa China na Serikali ya Mapinduzi ya Zanzibar wameweza kuanzishwa kitengo cha Uchunguzi wa Mfumo wa njia ya chakula katika hospitali ya MnaziMmmoja hapa Unguja na kitengo cha viungo na ajali huko katika Hospitali ya Abdalla Mzee Pemba.

Pamoja na hayo, Madaktari hao walieleza kuwa katika juhudi zao za kutoa huduma za afya hapa Zanzibar waliweza kufanya ziara mbali mbali kwa ajili ya kutoa huduma vijijini, kutoa elimu ya afya katika vyombo vya habari kupitia Shirika la Utangazaji la Zanzibar ZBC, kutoa vitabu kwa ajili ya Chuo cha Afya Mbweni pamoja na kufundisha wanafunzi katika chuo maalum cha Afya Zanzibar.

Pia, walieleza kufanikisha wazo la  Dk. Shein alilowapa hapo Agosti 19 mwaka 2013 walipokuja kujitambulisha wazo la kutoa kipaumbele katika suala zima la kinga ya afya.

Aidha, Madaktari hao walieleza kuwa tokea nchi hiyo kuanza kuleta  Madaktari wake hapa Zanzibar tayari imeshatimia miaka 50 na kusisitiza kuwa umri huo si tu wa kutoa huduma za afya bali pia, ni umri ambao umeimarisha urafiki na udugu baina ya pande mbili hizo..

Pamoja na hayo, Madaktari hao walieleza jinsi walivyofurahishwa na maisha yao wakati wote walipoishi Zanzibar kwa kutembelea sehemu mbali mbali zikiwemo za kitalii na kujihisi wako nyumbani kwa muda wote na kutoa pongezi kwa ukaribu wa Wazanzibar na kueleza kupendezewa na maisha ya amani na utulivu wanayoishi Wazanzibari.

Nae Balozi Mdogo wa China anayefanya kazi zake hapa Zanzibar Mhe Xie Yunliang alimueleza Dk. Shein kuwa China itaendelea kuiunga mkono Zanzibar katika kuimarisha sekta zake  za maendeleo ambapo pia,alitumia fursa hiyo kumueleza maendeleo ya ujenzi wa Hospitali ya Abdalla Mzee huko Mkoni Pemba kuwa unaendelea vizuri.

Rajab Mkasaba, Ikulu Zanzibar