RAIS wa Zanzibar na Mwenyekiti wa Baraza la Mapinduzi, Mhe. Dk. Ali Mohamed Shein, amemtumia salamu za rambi rambi Kadhi Mkuu wa Tanzania Bara Samahat Sheikh Abdulla Yussuf Mnyasi, kufuatia kifo cha Sheikh Issa Shaaban Simba, Sheikh Mkuu na Mufti wa Tanzania Bara.

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

RAIS wa Zanzibar na Mwenyekiti wa Baraza la Mapinduzi, Mhe. Dk. Ali Mohamed Shein, amemtumia salamu za rambi rambi Kadhi Mkuu wa Tanzania Bara Samahat Sheikh Abdulla Yussuf Mnyasi,  kufuatia  kifo cha Sheikh Issa Shaaban Simba, Sheikh Mkuu na Mufti wa Tanzania Bara.

Katika salamu hizo za rambi rambi, Dk. Shein alisema kuwa amepokea kwa  masikitiko na mshituko mkubwa taarifa ya kifo cha  Sheikh Issa Shaaban Simba, Sheikh Mkuu na Mufti wa Tanzania Bara kilichotokea tarehe 15 Juni mwaka huu.

Salamu hizo za rambirambi pia, zilieleza kuwa kifo cha Sheikh Issa Shaaban Simba ni msiba mkubwa kwa Waislamu na Watanzania wote kwa jumla.

Akimuelezea Sheikh Issa Shaaban Simba katika salamu hizo, Dk. Shein alieleza kuwa Marehemu Sheikh Simba alikuwa ni kiongozi muadilifu mwenye taaluma kubwa na mwenye kupendelea umoja, mshikamano na elimu. ‘Sote tutazikosa busara na hekima zake kufuatia kifo hicho”,zilieleza salamu hizo.

Kwa niaba yake Dk. Shein na wananchi wote wa Zanzibar, anatoa salamu za rambirambi kwa ndugu, Waislamu wote na  wananchi wa Tanzania nzima kwa jumla.

Aidha, salamu hizo za rambirambi zilimuomba Kadhi Mkuu wa Tanzania Bara, Samahat Sheikh Abdalla Yussuf Mnyasi kuzifikisha kwa ndugu, jamaa na marafiki wote wa Marehemu Sheikh Simba.

“Tunawahakikishia kwamba sote tupo pamoja nao katika kipindi hiki kigumu cha msiba’,zilieleza salamu hizo.

Pamoja na hayo, salamu hizo zilimuomba Mwenyezi Mungu aiweke roho ya marehemu Sheikh Issa Shaaban Simba mahali pema peponi. Amin.

Rajab Mkasaba, Ikulu Zanzibar