Vyombo vya habari Zanzibar kutikiswa

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399. 

Imeandikwa na Khatib Suleiman, Zanzibar

WAZIRI wa Habari Utangazaji, Utalii na Michezo wa Zanzibar, Rashid Ali Juma amesema mabadiliko makubwa yanakuja katika taasisi na vyombo vya habari vilivyopo chini ya Serikali hiyo.

Kwamba lengo ni kuleta ufanisi na uwajibikaji katika sehemu za kazi, ikiwamo kuundwa kwa bodi mpya.

Juma alisema hayo wakati alipofanya ziara ya kushtukiza kwa vyombo vya habari, vinavyomilikiwa na Serikali ya Zanzibar ikiwamo gazeti la Zanzibar- Leo, ambapo wafanyakazi na waandishi wa habari walielezea kutoridhishwa na mazingira ya kazi yaliyopo hapo na suala la uadilifu katika masuala ya fedha.

Alitaja hatua zitakazochukuliwa kuwa ni pamoja na kuundwa kwa Bodi katika taasisi hizo zenye uwezo na kuleta mabadiliko makubwa, ikiwamo kufanya biashara yenye faida.

“Tunakusudia kufanya marekebisho makubwa katika taasisi za habari na nyingine ziliopo chini ya Wizara ya Habari kwa lengo la kuleta ufanisi wa kazi na kuondosha malalamiko,” alisema waziri huyo.

Waziri Juma akiwa katika gazeti la ZanzibarLeo, aliwataka kuunda timu imara itakayofanya kazi ya kukusanya madeni yanayodai gazeti hilo kutoka kwa taasisi mbalimbali za serikali, yanayofikia Sh milioni 300.

Aliwataka watendaji katika masuala ya fedha, kufuatilia madeni yote kujua nani amelipa na nani anadaiwa, ikiwa ni moja ya hatua ya kulifanya shirika hilo kujiendesha bila kutegemea ruzuku serikalini.

“Kazi ya kufuatilia na kutafuta madeni yanayotokana na mauzo ya magazeti pamoja na matangazo yapo kwa idara ya fedha ambao wao ndiyo watakaofahamu nani amelipa fedha na nani hajalipa na njia za kupata fedha hizo,” alisema Juma.

Baadhi ya waandishi wa habari waliozungumza, kwa nyakati tofauti walisema kwamba utendaji chini ya kiwango katika idara ya uhasibu, ndiyo chanzo cha kulifanya Shirika la Magazeti la Serikali ya Mapinduzi Zanzibar kuyumba na kushindwa kujiendesha kwa faida.

Mwandishi wa habari mwandamizi, Mwantanga Ame, alisema ipo haja ya kuwapo wafanyakazi watakaofuatilia na kujua hatma ya madeni ya shirika yanayotokana na matangazo yanayotangazwa na taasisi na wizara pamoja na mashirika ya umma.

“Tunakabiliwa na tatizo kubwa la mzigo wa madeni tunayodai kutoka Serikali na taasisi binafsi ambapo udhaifu upo katika suala zima la ufuatiliaji na utoaji wa risiti,” alisema.

Chanzo Gazeti la Habari Leo