KOPUNOVIC: SINA KIKOSI CHA KWANZA SIMBA

 Kocha wa Simba, Goran Kopunovic amefurahishwa na kiwango kilichoonyeshwa na wachezaji wake na kufanikiwa kufuzu kwa nusu fainali ya Kombe la Mapinduzi.

Kopunovic ameiongoza Simba kushinda mechi tatu mpaka sasa ukiwemo ushindi mnono wa mabao 4-0 dhidi ya Taifa Jang’ombe juzi katika hatua robo fainali.

Mserbia huyo alisema kwa sasa bado timu yake haijacheza katika kiwango anachotaka na hakuna mchezaji mwenye uhakika wa namba.

“Sipendi kusema nina kikosi cha kwanza hata mtu akiniuliza swali hilo silifurahii mimi nina wachezaji 11 wanaoanza siyo kikosi cha kwanza, hata hapa Simba nimewaambia hakuna anayemiliki namba,” alisema Kopunovic.

Katika hatua nyingine Kopunovic alisema yuko tayari kumpa muda mshambuliaji wake Dan Sserunkuma na kumtaka ajitume zaidi.

“Sserunkuma ni mtu muhimu hapa Simba, lakini ili atambulike kama mshambuliaji mzuri ni lazima ufunge.

“Hata mimi nilikuwa mshambuliaji, nilikutana na kipindi kigumu kama anachopitia Dan, lakini anatakiwa kupambana zaidi athibitishe uwezo wake.
 Chanzo:mwananchi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.