PENALTI ZAWABEBA MTIBWA, POLISI

  Wachezaji wa Mtibwa Sugar wakimpongeza kipa wao (aliyebebwa), Said Mohamed baada ya kupangua penalti mbili katika mchezo dhidi ya Azam katika mechi ya Robo Fainali ya kombe la Mapinduzi, uliopigwa jana katika Uwanja wa Amaan, Zanzibar. Mtibwa ilishinda kwa penalti 7-6. 

 Mtibwa Sugar na Polisi Zanzibar zimetinga nusu fainali ya mashindano ya Kombe la Mapinduzi kwa mikwaju ya penalti.

Awali Polisi Zanzibar iliwaondoa mabingwa watetezi  KCCA ya Uganda kwa penalti  5- 4, wakati  Mtibwa Sugar iliiondosha azam kwa penalti 7-6.

Kwa matokeo hayo sasa Polisi  itacheza na Simba iliyofuzu kwa nusu fainali juzi baada ya kuibamiza Taifa Jang’ombe mabao 4- 0, wakati Mtibwa Sugar itacheza hatua hiyo na mshindi kati ya Yanga na JKU iliyokuwa ikicheza jana usiku.

Katika mchezo  wa awali  Polisi na KCCA zilimaliza dakika 90 bila kufungana na hivyo kwenda hatua ya penalti huku kipa wa Polisi, Nasir Suleiman akiwa nyota katika hatua hiyo  baada ya kupangua mikwaju miwili ya KCCA  na mmoja ukigonga nguzo ya juu na hivyo kuisaidia timu yake kutinga nusu fainali.

Katika penalti hizo waliofunga kwa upande wa Polisi ni Daniel Joram, Mohamed Seif, Abdallah Mwalim,

Mohamed Kiburungo na  Ally Khalid wakati waliokosa ni Suleiman  Ally na Juma Mgunda.

 KCCA waliofunga ni  Tom Masiko, Ronnie Kiseka, Mpiima Saka na Owen Kasule wakati waliokosa ni Ivan Niege, William Gwadri na Simon Namwanja.

Katika robo fainali ya pili, Mtibwa Sugar na Azam zilimaliza dakika 90 kwa sare1- 1 na kulazimika mshindi kuamuliwa kwa penalti.

Mtibwa ilikuwa ya kwanza kupata  bao lililofungwa dakika ya 63 na Ally Shomari akipokea pasi ya Mussa Hassan ‘Mgosi’ kabla ya Azam kusawazisha bao hilo kupitia kwa Kipre Tchetche dakika ya 90 aliyemalizia krosi ya Abubakari Salum.

Timu hizo zilianza mechi hiyo taratibu na kujikuta zikienda mapumziko bila kufungana na ziliporudi kipindi cha pili zilionekana kushambuliana kwa zamu.

Waliofunga penalti kwa upande wa Mtibwa Sugar ni  Shabani Nditi, Henry Joseph, David Luhende, Vicent Barnabas, Mussa Nampaka, Muzamil Yassin na  Said Mkopi wakati aliyekosa ni Amme Ally.

Azam wafungaji ni  Aggrey Morris, Didier Kavumbagu, Erasto Nyoni, Brian Majwega, John Bocco, Pascal Wawa wakati waliokosa ni Kipre Tchetche na Aishi Manula.

 Chanzo:Mwananchi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.