SAUTI ZA BUSARA KUJUMUISHA VIKUNDI 19 VYA BURUDANI DUNIANI

 

Kikundi cha muziki kutoka Zanzibar, Tanzania, Culture Musical Club wakitumbuiza katika Tamasha la Sauti za Busara 2014. 

Mwaka jana tulishuhudia kituo kikubwa cha habari duniani kikiyataja matamasha saba bora ya kimataifa na Sauti za Busara likiwa tamasha lililoshika nafasi ya tatu.

Ni tamasha ambalo watu kutoka katika pembe zote za dunia, wiki ya pili ya Februari kila mwaka hukutana katika kisiwa cha marashi ya karafuu, Zanzibar ambako ndiko tamasha linakofanyika.

Kipindi cha Februari, Zanzibar ni eneo linalochangamka, eneo hilo lenye majengo ya kale hupambwa na muziki wa kisasa wa Kiafrika.

Watalii, wazawa, wanamuziki wakubwa wanaoimba na kupiga ala za muziki hukutana sehemu yenye mandhali iliyotulia, ndani ya eneo lenye hazina yenye historia na iliyo bora katika Afrika Mashariki Mji Mkongwe, Zanzibar pembezoni mwa Bahari ya Hindi ili kuchota sauti zenye busara zinazozalishwa na kundi la wasanii tofauti wa Kiafrika.

Kwa mwaka huu Tamasha la Sauti za Busara litafanyika kuanzia Februari 12 hadi 15, likiwa ni moja ya matamasha saba bora duniani ambayo unatakiwa kushuhudia na idadi ya wageni katika kipindi cha tamasha ikiendelea kuongezeka.

Mkurugenzi wa tamasha hilo, Yusuf Mahmoud anasema limekuwaurafiki na mataifa mengine duniani kwani mara zote limekua likitoa kipaumbelekwa wote pia kwa wenyeji na mwaka huu wameshusha gharama za viingilio kwa wenyeji kutoka Sh5,000 hadi Sh3,000.

“Kiingilio ni bure kwa wenyeji kabla ya saa 11 jioni na baada ya hapo ni Sh3,000 tu kwa Watanzania wote ili waweze kuhudhuria tamasha. Zaidi ya hapo, watoto wanaruhusiwa kuingia bila kutozwa chochote hivyo basi wenyeji wanachotakiwa ni kujitokeza na kusherekea muziki wa Afrika na wakipeperusha bendera ya Tanzania, pamoja na wageni,” anasema Mahmoud.

Anasema kwa kupitia mchango wa Sauti za Busara, Tanzania inaendelea kujidhatiti katika ramani ya dunia katika suala zima la utalii wa kiutamaduni.

“Sauti za Busara inawaleta watu pamoja, hutoa ajira, inasaidia kuimarisha utamaduni wa asili, inaendeleza wasanii pamoja na kukutana na kujifunza kutoka kwa wenzao, pia inatangaza utalii wa kiutamaduni wa Tanzania. Mbali na hapo, Sauti za Busara inafanya kazi kubwa katika nchi ikiwemo kukuza amani na umoja kwa kuheshimu utofauti na mchanganyiko wa utamaduni mbalimbali,” anasema Mahmoud.

Licha ya kutajwa kwamba yanakuza utalii, matamasha makubwa yanayofanyika hapa nchini yameelezwa kuwa na msaada katika kuhamasisha vijana wadogo kupenda utamaduni wao. Mahmoud anasema hayo ni baadhi ya mafanikio ya matamasha makubwa, ambayo pia hutoa fursa kwa wanamuziki wa hapa nchini kuchangamana na kubadilishana mawazo na wanamuziki kutoka mataifa mbalimbali.

Tamasha hilo ukiacha kutoa fursa za kutengeneza mitandao kwa wasanii wa ndani, Serikali ya Tanzania imeonyesha katika takwimu zilizotolewa tangu tamasha lianze mwaka 2004, utalii umekua kwa kiwango kikubwa huku idadi ya watalii ikiongezeka hadi kufikia asilimia 500.

Shindano la kuimba laanzishwa

Tamasha la mwaka huu na likiwaleta pamoja wasanii tofauti na watazamaji kusherekea muziki wa Kiafrika inahodhi shindano, kukiwa na zawadi ya pesa taslimu ambayo ni pesa ya kurekodi kwa washindi wa nyimbo za amani.

Mahmoud anasema, “Sauti za Busara 2015 litaisaidia kukuza amani kwa kutumia muziki ambapo vikundi 15 kutoka Tanzania, sambamba na vingine vya kimataifa vitatoa sauti za ujumbe wa amani, umoja na mshikamano katika maonyesho yao. Tunatarajia kwamba (sauti) hizi zitasikika kwa nguvu na uwazi.”

Anasema wasanii wa Kitanzania walioingia katika shindano hilo ni pamoja na Leo Mkanyia, Msafiri Zawose, Mohamed Ilyas, Zee Town Sojaz, Ifa Band, Mgodro Group, Mabantu Africa na wengine wengi.

“Shindano la Nyimbo za Amani litafanyika kati ya saa 10:00 jioni Alhamisi ya Februari 12 na saa 2:00 usiku wa Jumapili ya Februari 15. Shindano liko wazi kwa wakazi au wazawa wa Tanzania. Vikundi vyote vya Kitanzania vinavyoshiriki kwenye tamasha vinaalikwa kutunga nyimbo maalumu yenye dhima ya amani na umoja na kuifanyia onyesho katika mida yao ya kutumbuiza katika tamasha,” anasema Mahmoud.

Anasema fedha taslimu zitazawadiwa kwa ajili ya uzalishaji wa rekodi kitaalamu wa nyimbo zenye ubunifu: Sh4 milioni (mshindi wa 1), Sh3 milioni (mshindi wa 2) na Sh2 milioni kwa mshindi wa tatu.

Wakiwemo pamoja na wasanii wakubwa wa kimataifa kama Blitz the Ambassador kutoka Ghana, tamasha litashereheshwa na Tcheka (Cape Verde), Isabel Novella (Mozambique), Aline Frazao (Angola), Octopizzo na wengineo.

Wasanii watakaowakilisha Tanzania katika Sauti za Busara 2015 ni Ali Kiba, Msafiri Zawose, Leo Mkanyia, Culture Musical Club, Mgodro Group, Mabantu Africa Ifa Band, Cocodo African Music na wengineo.
 Chanzo:Mwananchi

Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.