NI TANZANIA BARA VS VISIWANI LEO

  Kocha mkuu wa Simba, Goran Kopunovic (wa pili kushoto) kitoa maelekezo kwa baadhi ya wachezaji katika mazoezi ya jana asubuhi yaliyofanyika kwenye Uwanja wa Chuo cha Kiislamu Chukwani, kujiandaa na mchezo wao wa leo wa Kombe la Mapinduzi dhidi ya Polisi Zanzibar. Kulia ni kocha msaidizi, Seleman Matola

Mashindano ya Kombe la Mapinduzi yanaingia katika hatua ya nusu fainali hii leo, wakati timu mbili kutoka Tanzania Bara, Simba na Mtibwa Sugar zitakapocheza dhidi ya mbili za visiwani Zanzibar, Polisi Zanzibar na JKU (Jeshi la Kujenga Uchumi)

Simba ilifuzu kwa hatua hiyo baada ya kuifumua Taifa Jang’ombe kwa mabao 4-0 na leo inakutana na Mafunzo katika mchezo wa nusu fainali.

Kwa upande wao, Mtibwa ilifanikiwa kutinga nusu fainali baada ya ushindi wao wa mikwaju ya penalti dhidi ya Azam FC, zilipomaliza dakika 90 kwa sare ya bao 1-1 juzi.

JKU iliwashangaza wengi kwa kuwaondoa mabingwa wa zamani wa Tanzania Bara walioanza mashindano hayo kwa kasi kubwa, Yanga, licha ya kushambuliwa muda mwingi wa mchezo huo kabla ya kuibuka na ushindi wa bao 1-0 juzi.

Mchezo wa kwanza wa leo utakaozikutanisha Mtibwa dhidi ya JKU unatazamwa kwa tofauti kubwa hasa kutokana na maafande hao wa visiwani kuishangaza Yanga kwa bao la kushtukiza na kulilinda muda wote wa mchezo. Tangu kutua kwa kocha huyo raia wa Serbia, Simba imeimarika kwa kushinda mechi zote tatu ilizocheza baada ya kupoteza mechi ya ufunguzi na itaingia katika mchezo wa leo ikiwa na tahadhari kubwa kutokana na timu za Zanzibar kutotabirika.

Akizungumzia mchezo huo, Kopunovic alisema kutokana na matokeo yaliyomshtua ya vigogo Yanga na Azam kutolewa juzi katika mechi zao za robo fainali, wamejipanga kuhakikisha wanaitumia hali hiyo kama tahadhari kwao kwani Polisi pia waliwavua ubingwa mabingwa watetezi, KCCA ya Uganda.

“Hakuna aliyeweza kufikiria kwa haraka kitu kama kile cha Yanga na Azam kutolewa mapema, hata mimi nimeshtuka, hii inathibitisha kwamba kuna timu hazitabiriki, sasa akili yetu ni kwamba tunataka ushindi lakini ni lazima tuongeze umakini katika uchezaji wetu,” alisema Kopunovic

Wakati Kopunovic akisema hivyo, kocha mwenzake wa Polisi, Hamis Sufiani alisema baada ya kuiondoa KCCA sasa wanataka kufanya kama hivyo kwa Simba kutokana na kuwa na uwezo wa kuwafunga wekundu hao.

“Kwetu mechi ngumu ilikuwa ni ile dhidi ya KCCA ambayo kwanza inatoka nje, lakini aina ya soka lao tulikuwa hatulijui, sasa tunakutana na Simba ambayo tunaijua karibu kila kitu, tunataka kuifunga ili tulibakishe kombe hili hapa kwetu,” alitamba Sufiani.

Mchezo wa mapema utakaopigwa jioni utazikutanisha Mtibwa Sugar ya Morogoro itakayoumana na JKU katika mchezo ambao utakuwa ni kusaka mshindi mara mbili kutokana na timu hizo kutoka kundi moja huku zote zikitoka sare ya kufungana bao 1-1.

JKU iliyokata tiketi hiyo kwa kuifunga Yanga bao 1-0 itakutana na Mtibwa Sugar ambao iliwaondoa matajiri wa Azam kwa mikwaju ya penalti 7-6.

Akizungumzia mechi hiyo, Kocha wa Mtibwa, Mecky Mexime alisema wamejiandaa vizuri kupata ushindi katika mechi hiyo ambayo wanatambua kwamba wanakutana na timu ngumu.
Wanajeshi hao wa JKU ni wazi wataingia katika mchezo huo wakijivunia kasi ya mshambuliaji wao maarufu Amour Mohamed ‘Janja’.
Chanzo:Mwananchi

 Ikiwa unatukio lolote au jambo lolote tuma kupitia Barua pepe yetu blogzamikoa@live.com au Whatsapp namba +255765056399.